【陳頌文隨筆】努力適應前鋒位置

【Now Sports】經過開季幾場比賽，我覺得自己需要加強嘅地方係對新位置嘅認識，因為教練安排踢前鋒，但自己對呢個位置唔太熟悉，需要改善。
撰文：陳頌文

今季第1場對班士利（賽和2:2），可能仲未適應返比賽節奏，表現一般，球隊就表現唔錯，比較要做好啲嘅係需要快啲入局，適應對手踢法同節奏。第2場對列斯聯（負1:3），自己有入球踢得唔錯，球隊表現都唔錯，但係要做得好係隊友之間嘅配合、溝通，同埋未完場唔可以鬆懈。比賽早段我哋就領先，但未能keep到成場被對方反勝。第3場對米杜士堡（負1:3）整體表現都唔好，好遲入局同埋冇把握好機會。至於啱啱踢完第4場對史托港（贏3:0），係今季首場贏波，仍然踢前鋒，覺得自己嘅表現唔錯，整體成隊波都打得好好，希望可以保持呢個氣勢落去嚟緊幾場。

講返對列斯聯場波，我射入自己今季英乙第1球。當時隊友喺右側斬波嚟中間，個波落點係我同對方之間，我見佢唔解圍就衝前一步起腳就入網。就喺呢一場開始，教練安排我擔任前鋒，咁係因為本身踢前鋒嘅隊友受傷被換岀。嗰刻心情其實少少驚訝，不過亦有少少心理準備，因為見到教練準備換中場球員岀嚟。其實自己喺上季尾最後一場都係踢前鋒，而以前就係冇人至安排我推前，同埋係好細個嘅時候。

另外，呢幾場波除咗有屋企人、朋友，亦有其他香港人嚟為我打氣，好想同佢哋講返聲「多謝支持」。嚟緊準備入讀大學，既緊張又期待，我修讀Sports Science，都係主要朝向運動方面，希望可以兼顧大學課程同埋踢波。

撰文：陳頌文
前港隊代表，先後效力曼城青年隊、史篤城預備組與布力般流浪U21，新加盟AFC Fylde。

本欄不定期上載
部份圖片來源：AFC Fylde Women FC

域斯咸擬簽高路托尼囝囝

2024/11/22 15:48

布魯士4個月大外孫意外離世

2024/10/19 15:10